128. พิฬารวตชาตกํ
[128]
โย เว ธมฺมํ ธชํ [ธมฺมธชํ (สฺยา. ปี. ก.)] กตฺวา, นิคูฬฺโห ปาปมาจเร;
วิสฺสาสยิตฺวา ภูตานิ, พิฬารํ นาม ตํ วตนฺติฯ
พิฬารวตชาตกํ อฏฺฐมํฯ
129. อคฺคิกภารทฺวาชชาตกํ
[129]
นายํ สิขา ปุญฺญเหตุ, ฆาสเหตุ อยํ สิขา;
นางฺคุฏฺฐคณนํ ยาติ, อลํ เต โหตุ อคฺคิกาติฯ
อคฺคิกภารทฺวาชชาตกํ นวมํฯ
130. โกสิยชาตกํ
[130]
ยถา วาจา จ ภุญฺชสฺสุ, ยถา ภุตฺตญฺจ พฺยาหร;
อุภยํ เต น สเมติ, วาจา ภุตฺตญฺจ โกสิเยติฯ
โกสิยชาตกํ ทสมํฯ
กุสนาฬิวคฺโค [สริกฺขวคฺโค (ก.)] เตรสโมฯ
ตสฺสุทฺทานํ –
กุสนาฬิสิริวฺหยโน จ ยสํ, ทธิ มมฺพ กฏาหกปญฺจมโก;
อถ ปาปก ขีร พิฬารวตํ, สิขิ โกสิยสวฺหยเนน ทสาติฯ
14. อสมฺปทานวคฺโค
131. อสมฺปทานชาตกํ
[131]
อสมฺปทาเนนิตรีตรสฺส, พาลสฺส มิตฺตานิ กลี ภวนฺติ;
ตสฺมา หรามิ ภุสํ อฑฺฒมานํ, มา เม มิตฺติ ชียิตฺถ สสฺสตายนฺติฯ
อสมฺปทานชาตกํ ปฐมํฯ
132. ภีรุกชาตกํ
[132]
กุสลูปเทเส ธิติยา ทฬฺหาย จ, อนิวตฺติตตฺตาภยภีรุตาย [อวตฺถิตตฺตาภยภีรุตาย (สี. สฺยา. ปี.)] จ;
น รกฺขสีนํ วสมาคมิมฺหเส, ส โสตฺถิภาโว มหตา ภเยน เมติฯ
ภีรุก [ปญฺจครุก (สี. ปี.), ปญฺจภีรุก (สฺยา.), อภยภีรุต§(?)] ชาตกํ ทุติยํฯ
133. ฆตาสนชาตกํ
[133]
เขมํ ยหิํ ตตฺถ อรี อุทีริโต [อริ อุทฺธริโต (ก.)], ทกสฺส มชฺเฌ ชลเต ฆตาสโน;
น อชฺช วาโส มหิยา มหีรุเห, ทิสา ภชวฺโห สรณาชฺช โน ภยนฺติฯ
ฆตาสนชาตกํ ตติยํฯ
134. ฌานโสธนชาตกํ
[134]
เย สญฺญิโน เตปิ ทุคฺคตา, เยปิ อสญฺญิโน เตปิ ทุคฺคตา;
เอตํ อุภยํ วิวชฺชย, ตํ สมาปตฺติสุขํ อนงฺคณนฺติฯ
ฌานโสธนชาตกํ จตุตฺถํฯ
135. จนฺทาภชาตกํ
[135]
จนฺทาภํ สูริยาภญฺจ, โยธ ปญฺญาย คาธติฯ
อวิตกฺเกน ฌาเนน, โหติ อาภสฺสรูปโคติฯ
จนฺทาภชาตกํ ปญฺจมํฯ